’’اللہ تعالیٰ مرحوم کی مغفرت فرمائے اور لواحقین کو صبر دے‘‘، ’’اللہ پاک علی رضا اور ان کے اہلِ خانہ کو یہ صدمہ برداشت کرنے کی ہمت عطا فرمائے‘‘ اور ’’والدین کا بچھڑنا بہت بڑا دکھ ہے، اللہ تعالیٰ مرحوم کو جنت میں اعلیٰ مقام عطا فرمائے‘‘۔ پاکستانی اداکار علی رضا کے والد کے انتقال کی خبر سامنے آنے کے بعد مداحوں نے سوشل میڈیا پر گہرے دکھ اور افسوس کا اظہار کرتے ہوئے ان کے لیے دعائیں کی ہیں۔ پاکستانی شوبز انڈسٹری کے معروف اداکار علی رضا اس وقت اپنے کیریئر کے عروج پر ہیں اور مختلف مقبول ڈراموں میں اپنی اداکاری سے ناظرین کی توجہ حاصل کر رہے ہیں، تاہم اسی دوران ان کی زندگی سے ایک انتہائی افسوسناک خبر سامنے آئی ہے۔ علی رضا نے اپنے والد کے اچانک اور انتقالِ پُرمَلَال کی اطلاع سوشل میڈیا کے ذریعے مداحوں کے ساتھ شیئر کی۔ اداکار نے انسٹاگرام اسٹوری پر ’’انا للہ و انا الیہ راجعون‘‘ لکھتے ہوئے بتایا کہ ان کے والد اچانک اس دنیا سے رخصت ہوگئے ہیں۔ علی رضا نے اپنی پوسٹ میں مداحوں سے والد کی مغفرت کے لیے خصوصی دعا کی اپیل بھی کی۔ والد کے انتقال کی خبر سامنے آتے ہی مداحوں اور شوبز سے وابستہ افراد نے اداکار سے اظہارِ تعزیت کرتے ہوئے مرحوم کے لیے دعائے مغفرت کی۔ علی رضا نے اداکاری کا آغاز ہدایتکارہ ہانیہ عامر اور دیگر فنکاروں کے ساتھ ڈرامہ ’’محبت گمشدہ میری‘‘ سے کیا تھا، جس کے بعد انہوں نے ’’نور جہاں‘‘، ’’اقتدار‘‘ اور ’’دنیاپور‘‘ جیسے کامیاب ڈراموں میں اپنی اداکاری کے جوہر دکھائے۔ ان دنوں علی رضا کے دو ڈرامے ’’لیڈر‘‘ اور ’’مرزا کی ہیر‘‘ بھی پرائم ٹائم میں نشر ہورہے ہیں اور ناظرین کی جانب سے ان کے کرداروں کو پسند کیا جا رہا ہے۔ ایسے میں کیریئر کے اہم مرحلے پر والد کے انتقال کی خبر نے ان کے مداحوں کو بھی افسردہ کردیا ہے۔ مداحوں نے علی رضا کے ساتھ ہمدردی کا اظہار کرتے ہوئے دعا کی کہ اللہ تعالیٰ مرحوم کی کامل مغفرت فرمائے، انہیں جنت الفردوس میں اعلیٰ مقام عطا کرے اور علی رضا سمیت تمام اہلِ خانہ کو یہ ناقابلِ تلافی صدمہ برداشت کرنے کا حوصلہ دے۔ آمین۔