"فیرزو خان کبھی کسی کردار میں نہیں ڈھلتا، وہ ہمیشہ خود ہی رہتا ہے" سینئر اداکارہ نادیہ افگن نے اپنے حالیہ انٹرویو میں فیروز خان کی اداکاری پر وہ بات کہہ دی جس پر انڈسٹری برسوں سے سرگوشیاں کرتی رہی ہے۔ "میں نے ان کے ساتھ کام تو کبھی نہیں کیا، لیکن سنا ہے کہ ان کے ساتھ اداکاراؤں کا کام کرنا آسان نہیں ہوتا، وہ ہمیشہ خود کو برتر دکھانے کی کوشش کرتے ہیں"، نادیہ افگن نے بےباکی سے کہا۔ بات یہیں ختم نہیں ہوئی، انہوں نے فیروز خان کی اداکاری پر بھی خاصی سخت رائے دی۔ ان کا کہنا تھا، "وہ جو بھی کردار کرتا ہے، اصل میں وہ کردار نہیں بلکہ خود فیرزو ہوتا ہے، ہر بار ایک ہی چہرہ، ایک جیسا انداز، ایک جیسا مزاج، جیسے اداکاری نہیں بلکہ اپنا آئینہ دکھا رہا ہو۔" ان کا یہ تجزیہ ڈرامہ ہمراز میں فیروز خان کی حالیہ پرفارمنس کے حوالے سے تھا، جس میں وہ حسبِ روایت روایتی بگڑیل امیرزادے کے روپ میں نظر آتے ہیں۔ نادیہ افگن کے مطابق، فیروز کا ہر کردار ان کی شخصیت کی ہی ایک جھلک ہوتا ہے، جو ان کی اداکاری کی محدودیت کو ظاہر کرتا ہے۔ سوشل میڈیا پر ان کے تبصرے نے ایک نیا ہنگامہ کھڑا کر دیا ہے۔ کچھ صارفین نے نادیہ افگن کی رائے سے اتفاق کرتے ہوئے کہا کہ فیروز خان اب خود کو دہرا رہے ہیں، جبکہ دوسرے حلقے نے ان کی تنقید کو ذاتی حملہ قرار دے کر مسترد کر دیا۔ ایک صارف نے لکھا، "اگر نادیہ نے ان کے ساتھ کام نہیں کیا تو کسی کے رویے پر بات کرنا مناسب نہیں"، جبکہ ایک اور رائے تھی کہ "ان کی تنقید صرف کرداروں کی نوعیت پر ہونی چاہیے تھی، ذاتی کردار کشی پر نہیں۔"