ایرانی ریال کی قدر امریکی ڈالر کے مقابلے میں ریکارڈ حد تک گر گئی، ایک امریکی ڈالر 13 لاکھ ایرانی ریال کے برابر ہوگیا ہے۔ جرمن نشریاتی ادارے کی رپورٹ کے مطابق ایرانی کرنسی کو درپیش اس کی قدر میں مسلسل کمی کا بحران گزشتہ دو ہفتوں سے بھی کم عرصے میں شدید ہوگیا ہے۔ ایران کے جوہری پروگرام پر بین الاقوامی طاقتوں کے ساتھ 2015 میں طے پانے والے معاہدے کے وقت ایک امریکی ڈالر 32,000 ایرانی ریال کے برابر تھا، تاہم 2018 میں امریکا نے یکطرفہ طور پر اس معاہدے سے علیحدگی کا اعلان کردیا جس کے بعد امریکی پابندیوں کے نتیجے میں ایرانی کرنسی کی قیمت مسلسل کمی کا شکار رہی اور تین دسمبر 2025 کو ایک امریکی ڈالر 12 لاکھ ایرانی ریال کا ہوگیا جو محض دو ہفتے بعد اب 13 لاکھ ریال کا ہوچکا ہے۔ ملکی کرنسی کی قدر میں کمی کی وجہ سے ایرانی عوام کو افراط زر اور روزمرہ زندگی کے اخراجات میں بے تحاشا اضافے جیسے مسائل کا سامنا ہے۔