بلوچستان کے مختلف علاقوں میں سیکیورٹی فورسز نے انٹیلی جنس معلومات کی بنیاد پر کارروائیاں کرتے ہوئے 10 دہشت گرد ہلاک کر دیے، جبکہ 2 خودکش بمبار خواتین اور ایک سہولت کار کو گرفتار کر لیا گیا۔
پاک فوج کے شعبۂ تعلقات عامہ (آئی ایس پی آر) کے مطابق گزشتہ 48 گھنٹوں کے دوران ضلع سوراب اور مستونگ میں مشترکہ آپریشنز کیے گئے۔ سوراب میں کارروائی کے دوران 7 دہشت گرد مارے گئے، جبکہ مستونگ میں مزید 3 دہشت گرد ہلاک کیے گئے۔
آئی ایس پی آر کے مطابق مستونگ میں ہونے والے آپریشن کے دوران 2 خودکش بمبار خواتین اور ایک سہولت کار کو گرفتار کیا گیا۔ کارروائی کے دوران دہشت گردوں کے قبضے سے بھاری مقدار میں اسلحہ، گولہ بارود اور بارودی مواد بھی برآمد کیا گیا۔
ترجمان پاک فوج کا کہنا ہے کہ بلوچستان میں دہشت گردوں اور ان کے سہولت کاروں کے خلاف کارروائیاں تسلسل کے ساتھ جاری ہیں اور غیر ملکی سرپرستی میں ہونے والی دہشت گردی کے مکمل خاتمے تک آپریشنز بلا تعطل جاری رہیں گے۔