بھارت کی جانب سے سلال ڈیم کے گیٹ کھولے جانے کے بعد دریائے چناب میں پانی کے بہاؤ میں اضافے کا خدشہ پیدا ہوگیا جس کے پیش نظر سیالکوٹ اور وزیر آباد سمیت ملحقہ علاقوں میں ہائی الرٹ جاری کر دیا گیا ہے۔ محکمہ آبپاشی پنجاب کے مطابق ڈیم سے پانی چھوڑے جانے کے باعث دریائے چناب میں پانی کی سطح بلند ہونے کا امکان ہے جس کے باعث نشیبی علاقوں میں ممکنہ سیلابی صورتحال سے نمٹنے کے لیے متعلقہ اداروں کو الرٹ کر دیا گیا ہے۔ محکمہ آبپاشی کا کہنا ہے کہ سیالکوٹ اور وزیر آباد میں ہنگامی اقدامات شروع کر دیے گئے ہیں جبکہ ضلعی انتظامیہ اور ریسکیو اداروں کو ہر ممکن صورتحال سے نمٹنے کے لیے تیار رہنے کی ہدایات جاری کر دی گئی ہیں۔ اسسٹنٹ کمشنر وزیر آباد جواد پیرزادہ کے مطابق آئندہ 48 گھنٹے انتہائی اہم ہیں کیونکہ اس دوران دریائے چناب میں بڑے سیلابی ریلے کے پہنچنے کا امکان ہے۔ انہوں نے بتایا کہ صوبائی ڈیزاسٹر مینجمنٹ اتھارٹی (پی ڈی ایم اے) نے بھی بڑے سیلاب کے خدشے سے آگاہ کیا ہے جبکہ ضلعی انتظامیہ مسلسل صورتحال کی نگرانی کر رہی ہے اور حفاظتی اقدامات کو مزید مؤثر بنایا جا رہا ہے۔