چین کے جیانگ سو صوبے سے تعلق رکھنے والے انجینئر لی کو بار بار اور غیر معمولی طویل باتھ روم بریک لینے پر اپنی ملازمت سے برطرف کر دیا گیا ہے۔ چینی میڈیا کے مطابق لی نے اپریل اور مئی 2024 کے دوران ایک ماہ میں 14 مرتبہ طویل باتھ روم بریک لیے جن میں سب سے طویل وقفہ چار گھنٹے تک رہا۔ برطرفی کے بعد لی نے کمپنی کے اقدام کو غیر قانونی قرار دیتے ہوئے عدالت سے رجوع کیا اور تین لاکھ 20 ہزار یوآن (تقریباً 45 ہزار امریکی ڈالر) ہرجانے کا دعویٰ دائر کیا۔ انہوں نے عدالت میں بتایا کہ وہ بیماری میں مبتلا ہیں اور پچھلے سال مئی اور جون میں ادویات آن لائن خریدی تھیں، جس کے ریکارڈ بھی موجود ہیں، نیز رواں سال جنوری میں سرجری کا ریکارڈ بھی پیش کیا۔ عدالت نے اس معاملے کا فیصلہ سناتے ہوئے کہا کہ لی نے جو وقت باتھ روم میں گزارا وہ اس کی جسمانی ضروریات سے بہت زیادہ تھا لہٰذا کمپنی کی جانب سے انہیں برطرف کرنا جائز قرار دیا جاتا ہے۔ یہ واقعہ حال ہی میں شنگھائی فیڈریشن آف ٹریڈ یونینز کی رپورٹنگ میں سامنے آیا جس میں کمپنی کے غیر معمولی طرز عمل اور ملازم کے حقوق کے معاملے کو اجاگر کیا گیا تھا۔