پاکستان شوبز انڈسٹری کی معروف اداکارہ اشنا شاہ نے اپنے حمل کے دوران پیش آنے والی جسمانی اور جذباتی مشکلات کے بارے میں کھل کر گفتگو کرتے ہوئے اسے اپنی زندگی کے سب سے مشکل مراحل میں سے ایک قرار دیا ہے۔ اشنا شاہ اپنے مقبول ڈراموں میں شاندار اداکاری کے باعث شہرت رکھتی ہیں اور مئی 2026ء میں انہوں نے اپنے حمل کی خوشخبری ایک خوبصورت فوٹو شوٹ کے ذریعے مداحوں کے ساتھ شیئر کی تھی۔ اس موقع پر انہوں نے اللہ تعالیٰ کا شکر ادا کرتے ہوئے اپنی زندگی کے نئے سفر کے آغاز کو ایک خاص لمحہ قرار دیا تھا۔ اداکارہ اس وقت حمل کے تیسرے مرحلے (Third Trimester) میں ہیں اور سوشل میڈیا پر اپنے تجربات مسلسل شیئر کر رہی ہیں۔ ان کا کہنا ہے کہ حمل کا یہ سفر ان کے لیے اتنا آسان اور خوشگوار نہیں رہا جتنا عام طور پر سمجھا جاتا ہے۔ انہوں نے انکشاف کیا کہ انہیں شدید موڈ سوئنگز، جسم میں سوجن، مسلسل تھکن، مناسب خوراک اور پانی کی کمی جیسے مسائل کا سامنا ہے، جبکہ وہ ڈلیوری کے مرحلے کے حوالے سے بھی فکرمند ہیں۔ اشنا شاہ نے اپنی انسٹاگرام اسٹوریز اور ویڈیوز میں مزاحیہ انداز اپناتے ہوئے حمل کو “اولمپک کھیل” سے تشبیہ دی اور کہا کہ یہ جسمانی اور جذباتی طور پر انتہائی مشکل مرحلہ ہے، جس کا اندازہ صرف وہی خواتین لگا سکتی ہیں جو اس تجربے سے گزرتی ہیں۔