پاکستان کی سپر اسٹار ماہرہ خان نے کہا ہے کہ وہ اپنی زندگی کے موجودہ مرحلے سے بھرپور لطف اندوز ہو رہی ہیں اور انہیں اس بات کی کوئی فکر نہیں کہ مستقبل میں انہیں روایتی ہیروئن کے کردار کم ملیں گے۔ انہوں نے کہا کہ کامیابی اور مداحوں کی محبت ان کے لیے بہت اہم ہے اور وہ اپنے فینز کے ساتھ تعلق کو قدر کی نگاہ سے دیکھتی ہیں۔ماہرہ خان کے مطابق وہ جانتی ہیں کہ شہرت اور کامیابی ہمیشہ قائم نہیں رہتیں، اس لیے ان کی پوری توجہ اپنے کام پر مرکوز رہتی ہے۔ اداکارہ نے کہا کہ وہ اپنی عمر اور زندگی کے اس مرحلے سے مطمئن ہیں اور انہیں اس بات کی فکر نہیں کہ ایک وقت آئے گا جب انہیں ہیروئن کے کردار نہیں ملیں گے، بلکہ وہ اس حقیقت کو خوش دلی سے قبول کرتی ہیں۔ انہوں نے ہدایت کاروں اور پروڈیوسرز سے درخواست کی کہ انہیں روایتی کرداروں کے بجائے مختلف اور منفرد کرداروں میں موقع دیا جائے تاکہ وہ اپنی اداکاری کے مزید پہلو ناظرین کے سامنے لا سکیں۔