پاکستان شوبز انڈسٹری کی نامور اداکارہ ماہرہ خان نے کوئٹہ کے اسپتال میں لیڈی ڈاکٹر پر تیزاب پھینکنے کے افسوسناک واقعے پر شدید برہمی اور دکھ کا اظہار کیا ہے۔ اداکارہ نے سوشل میڈیا پر اپنی ایک پوسٹ میں لکھا کہ ایک خاتون دوسروں کی زندگیاں بچانے کی خاطر اپنے فرائض انجام دینے گئی اور کسی نے اس کے چہرے پر تیزاب پھینک دیا۔ ماہرہ خان نے اس واقعے پر گہرے غصے کا اظہار کرتے ہوئے کہا کہ وہ اس وحشیانہ عمل اور برائی پر اندر سے کانپ رہی ہیں۔ انہوں نے لکھا کہ ڈاکٹر ماہ نور ناصر پر اسپتال کے اندر حملہ کیا گیا، اس شخص نے خاتون ڈاکٹر کو تقریباً زندہ جلا دیا جس کا یہ خیال تھا کہ اسے کسی کی زندگی تباہ کرنے کا حق حاصل ہے۔ اداکارہ نے تاکید کی کہ خواتین صحت اور تحفظ کی مستحق ہیں اور اب وقت آ گیا ہے کہ صرف خواتین ہی نہیں بلکہ مرد بھی اس ظلم کے خلاف اپنی آواز بلند کریں اور غصے کا اظہار کریں۔ واضح رہے کہ کوئٹہ کے سنڈیمن اسپتال میں ایک شخص نے ڈیوٹی پر موجود لیڈی ڈاکٹر پر تیزاب پھینک دیا تھا، جس سے وہ شدید جھلس گئیں۔ متاثرہ خاتون ڈاکٹر کو اسپتال میں ابتدائی طبی امداد دینے کے بعد پہلے ایک نجی اسپتال منتقل کیا گیا تھا، جہاں سے اب انہیں بہتر علاج اور طبی سہولیات کے لیے ایئر ایمبولینس کے ذریعے کراچی منتقل کر دیا گیا ہے۔