بھارت نے ایک بار پھر بگلیہار اور سلال ڈیمز سے پانی چھوڑ کر آبی جارحیت کا مظاہرہ کیا ہے، جس کے بعد پاکستان میں دریائے چناب میں سیلاب کے خطرات بڑھ گئے ہیں۔ فلڈ فورکاسٹ ڈپارٹمنٹ (ایف ایف ڈی) نے صورتحال کے پیش نظر الرٹ جاری کرتے ہوئے خبردار کیا ہے کہ آئندہ 24 گھنٹوں کے دوران دریائے چناب میں درمیانے سے اونچے درجے کے سیلاب کا امکان ہے۔ ایف ایف ڈی کے مطابق ہیڈ مرالہ، خانکی اور قادرآباد کے مقامات پر پانی کے بہاؤ میں نمایاں اضافہ متوقع ہے، جہاں درمیانے سے اونچے درجے کے سیلاب کی صورتحال پیدا ہوسکتی ہے۔ رپورٹ میں یہ بھی بتایا گیا ہے کہ دریائے جہلم میں منگلا کے مقام پر نچلے سے درمیانے درجے کے سیلاب کا امکان ہے، جبکہ دریائے سندھ میں تربیلا، کالا باغ اور چشمہ بیراج کے مقامات پر نچلے درجے کے سیلاب کی پیش گوئی کی گئی ہے۔ متعلقہ اداروں نے دریا کے کنارے آباد آبادیوں کو محتاط رہنے، مقامی انتظامیہ سے رابطے میں رہنے اور کسی بھی ہنگامی صورتحال سے نمٹنے کے لیے پیشگی حفاظتی اقدامات اختیار کرنے کی ہدایت کی ہے۔